За нас

ХУМАНИ ГРАДОВИ е граѓанска иницијатива основана во 2020 година. Целта на оваа иницијатива е да придонесе кон унапредување на формалните модели на планирање на градот и градските простори, но и да понуди нови, алтернативни модели на планирање на градот и градските простори преку кои се промовираат и негуваат инклузивниот пристап, интересите на заедницата и јавното добро.

Учество во планирањето на градот

Учеството на граѓаните во процесите низ кои се дефинираат и обликуваат градските простори и покрај тоа што е законски загарантирано, во голема мера е сѐ уште ограничено. Планирањето на градот најчесто е предводено од интересите на поединци, ставајќи го јавниот интерес во втор план. Во недостиг на соодветна законска регулатива, која ќе го приоритизира јавниот интерес и општото добро, целта на оваа иницијатива е да ги премости бариерите помеѓу граѓаните, како претставници на јавниот интерес, и институциите, во обид за создавање на инклузивни и транспарентни алатки за планирање на градот.

Слободни јавни простори

Постапките за уредување на отворените јавните простори, а особено при процесите на нивна трансформација, често резултира со простори кои немаат соодветна програмска сложеност, капацитативно се ограничени, не ги поседуваат соодветните препорачани или пропишани карактеристики, а како резултат на тоа не ја вршат очекуваната функција, односно не ги рефлектираат потребите на заедницата. Јавните простори, како најважен просторен ресурс низ кој се негува социјалната компонента од градскиот живот, мора да бидат предмет на стручна, но и поширока расправа и во процесот на проектирање на истите да бидат вклучени сите засегнати чинители.

Планирање засновано на податоци

Планирањето на градот треба да биде засновано на информации и податоци кои ги застапуваат интересите на сите корисници. Често, во процесот на планирање на градот, селективно се бираат податоците врз база на кои се изготвуваат плановите, притоа занемарувајќи ги потребите на специфичните групи на корисници, како што се жените и децата. Прибирањето на податоци за тоа со какви простори и содржини располага градот, како се користат и дали ги отсликуваат потребите на граѓаните е клучен дел од процесот со цел да се обезбеди еднаква застапеност, но и да се има увид во тоа како се менуваат животните и корисничките навики, а како последица на просторните ограничувања или можности.

Здрава животна средина

Заштитата на животната средина мора да биде клучен дел во планирањето на градот. Правото на здрава животна средина е уставно загарантирано право, а државата треба да обезбеди услови за остварување на ова право. Советот за човекови права при Обединетите нации го препознава правото на здрава животна средина како основно човеково право.